ՎԱՉԵ ԳԱԲՐԻԵԼՅԱՆԸ ԿՐԿԻՆ ՆԱԽԱՐԱՐ
«Կառավարության կառուցվածքի մասին» օրենքում կառավարության առաջարկած փոփոխությունը երեկ ընդգրկվեց ԱԺ օրակարգում, ինչը խորհրդարանում ներկայացրեց ՀՀ արդարադատության նախարար Հովհաննես Մանուկյանը: Օրենքի այս փոփոխությամբ` Արտակարգ իրավիճակների նախարարությունը միանալու է տարածքային կառավարման նախարարությանը, ինչպես նաեւ ստեղծվելու է մի նոր նախարարություն` Միջազգային տնտեսական ինտեգրման եւ բարեփոխումների: Թե ում բաժին կհասնի նոր նախարարի պորտֆելը, արդեն իսկ քաղաքական կուլիսներում հստակ է, որ միջազգային տնտեսական ինտեգրման եւ բարեփոխումների նախարար կնշանակվի ՀՀ կառավարության աշխատակազմի նախկին ղեկավար-նախարար ՎԱՉԵ ԳԱԲՐԻԵԼՅԱՆԸ, ով այժմ զբաղեցնում է ՀՀ վարչապետի գլխավոր խորհրդականի պաշտոնը: Ավելին` որոշ ընդդիմադիր պատգամավորներ արդեն իսկ համակերպվել են այս մտքի հետ` հաշվի առնելով, որ պարոն Գաբրիելյանը հանգիստ բնավորություն ունի ու աչքի չի ընկնի ընդդիմության «հավին քըշ» ասելով:
ՀՐԱՆՏ ՍԱՐԱՖՅԱՆ