ԲՀԿ ՊԱՏԳԱՄԱՎՈՐԸ ՄԱՆԴԱՏՆԵՐԻ ՎԱՅՐ ԴՆԵԼՆ ԱՆԼՈՒՐՋ Է ՀԱՄԱՐՈՒՄ
"Իրավունքը" ԲՀԿ պատգամավոր Ստեփան Մարգարյանից պարզեց, թե ինչո՞ւ ԲՀԿ պատգամավորները համաժողովրդական շտաբների ձեւավորմանը զուգահեռ` վայր չեն դնում իրենց պատգամավորական մանդատները (ինչպես խորհուրդ է տալիս Ալիկ Արզումանյանը): Ի պատասխան` պատգամավորը խորհուրդ տվեց մեզ ավելի լուրջ բաներից խոսել:
-Այնուամենայնիվ, ինչո՞ւ ԲՀԿ պատգամավորները մանդատները վայր չեն դնում:
- Դուք ուզում եք, որ կյանքի բոլոր դեպքերը պլանավորե՞նք:
- Բայց հավանակա՞ն է, որ ԲՀԿ պատգամավորները մանդատները...
- Բայց ինչո՞ւ դնենք:
- Որպես բոյկոտի ձեւ` ուղղված իշխանություններին, իշխանափոխություն հայտարարելու համատեքստում:
- Մենք բոյկոտի շատ ավելի լուրջ ձեւեր գիտենք:
Հոկտեմբերի 24-ի եռյակի` ԲՀԿ-ի, ՀԱԿ-ի, եւ "Ժառանգության" համատեղ հանրահավաքին Ազատության հրապարակում ԲՀԿ առաջնորդ Գագիկ Ծառուկյանը հայտարարել էր, որ Հայաստանը ձախողումներ ունի նաեւ արտաքին քաղաքական դաշտում: Արդյոք ձախողում ասելով` ԲՀԿ առաջնորդը նկատի է ունեցել Հայաստանի` ԵՏՄ անդամակցությունը:
- Ոչ, խոսքը բազմաթիվ այլ ձախողումների մասին է:
- Ի՞նչ ձախողումների:
- Այդ թեմայի մասին կխոսենք հետո:
ՍՈՆԱ ԴԱՎԹՅԱՆ