"ԵՍ ՉԷԻ ԿԱՐՈՂ ՉՔՎԵԱՐԿԵԼ ԿԱՌԱՎԱՐՈՒԹՅԱՆ ԱՅՆ ՆԱԽԱԳԾԻՆ, ՈՐԻՆ ԻՆՔՍ ԿՈՂՄ ԷԻ"
Երեկ խորհրդարանում չընդունվեց "Վարչարարության հիմունքների եւ վարչական վարույթի մասին օրենքում փոփոխություններ կատարելու մասին" ու անձնական տվյալների պաշտպանության օրենքում փոփոխություններ կատարելու մասին կառավարության ներկայացրած օրինագծերը: Հետաքրքիրն այն է, որ սույն օրինագծերի տապալմանը մասնակցություն են ունեցել ՀՀԿ մի շարք պատգամավորներ:
Մասնավորապես, անձնական տվյալների պաշտպանության մասին օրինագծին, ըստ էլեկտրոնային գրանցման տվյալների, չեն քվեարկել ՀՀԿ պատգամավորներ Վրեժ Մարկոսյանը, Սպարտակ Մելիքյանը, Կարեն Կարապետյանը, Մանվել Բադեյանը` այն դեպքում, երբ վերոնշյալ պատգամավորները դահլիճում ներկա չեն եղել, եւ փոխանակ բացակա ստանալու` ստացել են ներկա, ու չեն քվեարկել: Իսկ պատգամավորներ Կարեն Ավագյանը, Մկրտիչ Մինասյանը, Հերմինե Նաղդալյանը բացակա են եղել:
Ի դեպ, անձնական տվյալների պաշտպանության մասին օրինագծին, կրկին ըստ խորհրդարանի կայքում տեղադրված քվեարկության արդյունքների, չի քվեարկել նաեւ Արփինե Հովհաննիսյանը, որը երեկ` որպես հարակից զեկուցող, պատասխանում էր պատգամավորների հարցերին եւ հորդորում վերջիններին` կողմ քվեարկել:
"Վարչարարության հիմունքների եւ վարչական վարույթի մասին օրենքում փոփոխություններ կատարելու մասին" օրինագծին դեմ է քվեարկել ՀՀԿ պատգամավոր Գարեգին Նուշիկյանը: Չեն քվեարկել ՀՀԿ պատգամավոր Վահրամ Մկրտչյանը, Նահապետ Գեւորգյանը, Համլետ Հարությունյանը, Սպարտակ Մելիքյանը: Իսկ պատգամավորներ Կարեն Ավագյանը, Մկրտիչ Մինասյանը, Հերմինե Նաղդալյանը կրկին բացակա են եղել: Պարզաբանման նպատակով "Իրավունքը" զրուցեց ՀՀԿ խմբակցության ղեկավար ՎԱՀՐԱՄ ԲԱՂԴԱՍԱՐՅԱՆԻ հետ: Պատգամավորները ներկա են եղել, իրենց կարծիքը հայտնել են քվեարկությամբ:
"Վրեժ Մարկոսյանը ներկա՞ է եղել դահլիճում",- հարցին ի պատասխան` Վահրամ Բաղդասարյանն ասաց, որ նա դահլիճում չի եղել, չի քվեարկել: Եթե դահլիճում չի եղել, պատգամավորը պետք է բացակա ստանար` հակադարձմանը ՀՀԿ խմբակցության ղեկավարն ասաց. "Կարող է ներկա է եղել, չգիտեմ: Ես տեղյակ չեմ` Վրեժ Մարկոսյանը ներկա է եղել, թե ոչ":
ՀՀԿ խմբակցության ղեկավարին հիշեցրինք նաեւ բացակա մյուս պատգամավորների անունները, ում անվան դիմաց "բացակա" ստանալու փոխարեն` գրված է "չեն քվեարկել": "Կարեն Կարապետյանն ընդմիջումից հետո չի եղել, Մանվել Բադեյանն էլ եղել է ՕԵԿ-ի կողմից նախապես վերցրած 20 րոպե ընդմիջումից հետո: Լավ ուսումնասիրեք",- հորդորեց մեզ ՀՀԿ խմբակցության ղեկավարը:
Ինչ վերաբերում է բացակա պատգամավորներին, նրանք, ըստ Վահրամ Բաղդասարյանի, գործուղման են: "Կարեն Ավագյանը գործուղմա՞ն է" հարցին` պրն Բաղդասարյանն ասաց, որ դեպք էր պատահել, Կարեն Ավագյանն ուշացումով եկավ: Իսկ Մկրտիչ Մինասյանն էլ վիրահատվել է: Հերմինե Նաղդալյանն էլ գործուղման մեջ է:
Իսկ թե ինչու "Անձնական տվյալների պաշտպանության մասին" օրինագծի հարակից զեկուցող Արփինե Հովհաննիսյանը չի քվեարկել, ՀՀԿ խմբակցության ղեկավարի պարզաբանմամբ` Արփինե Հովհաննիսյանը ձեռք է բարձրացրել ու հայտարարել, որ կողմ է օրինագծին:
ՀՀԿ պատգամավոր ԱՐՓԻՆԵ ՀՈՎՀԱՆՆԻՍՅԱՆՆ էլ, "Իրավունքի" հետ զրույցում ասաց, որ իսկապես պատճառը տեխնիկական է եղել: Նա կողմ է եղել օրինագծի ընդունմանը եւ ելնելով տեխնիկական խնդիրներից` ձեռք է բարձրացրել` կողմ լինելով օրինագծին. "Ես երեկ գրեթե ողջ օրը խոսեցի այդ օրինագծի դրական կողմերից, ինչպես կարող էի դեմ, կամ ձեռնպահ լինել: Տեխնիկական խնդիրների պատճառով այդպես է ստացվել: Միայն քվեարկելուց հետո նկատեցի, որ համակարգը չի աշխատել, եւ դրա համար ձեռք բարձրացրի: Ավելին` ես իմ գործընկերներին դեռ երեկվանից հորդորում էի, որ կողմ քվեարկեն այդ օրինագծին":
ՍՈՆԱ ԴԱՎԹՅԱՆ