Թուրքիայի խորհրդարանում ներկայացվել է Հայոց
ցեղասպանության ճանաչման մասին օրինագիծ
Թուրքիայի քրդամետ Ժողովրդա-դեմոկրատական կուսակցության կին պատգամավոր Սեբահաթ Թունջելը խորհրդարան է ներկայացրել Թուրքիայում տեղի ունեցած ջարդերը ճանաչելու և ներողություն խնդրելու օրինագիծ։
Համաձայն այդ օրինագծի` նախագահ Էրդողանը խորհրդարանում պետության անունից պետք է պաշտոնապես ներողություն խնդրի, հաջորդ օրը գնա կոտորածի վայրերից մեկը և այնտեղ ընթերցի ներողության տեքստը։
Նշվում է, որ պաշտոնապես ներողություն խնդրելուց հետո մեկ տարվա ընթացքում պետք է խորհրդարանում ստեղծվի հատուկ հանձնաժողով, և բացվեն թեմային առնչվող բոլոր արխիվները:
Օրինագծով առաջարկվում է ապրիլի 24-ը սգո օր հայտարարել ու ամրագրել օրացույցում, ինչպես նաև կատարել նյութական ու բարոյական փոխհատուցում:
Պատգամավորը Հայոց ցեղասպանության հետ միասին իր օրինագծում հիշատակում է նաև Դերսիմի, Մարաշի, Սվասի, Չուրումի քրդական կոտորածների մասին: