ՎԱՐՁՈՒ ԱՆԱՌԱԿՆԵՐ ԹԵՐԼԵՄԵԶՅԱՆ ՔՈԼԵՋՈՒՄ
Երեկ ՙԱզդակ՚ ակումբում կայացած մամլո ասուլիսում Փ. Թերլեմեզյանի անվան գեղարվեստի պետական քոլեջի խնդրի լուծման համար կազմված նախաձեռնող խմբի ներկայացուցիչները հանդես եկան մի քանի հայտարարություններով եւ ներկայացրեցին տնօրենի իրենց թեկնածու Դավիթ Դավթյանին: Բանախոսների տեղեկացմամբ, այդ պահի դրությամբ պարոն Դավթյանը տնօրենի միակ թեկնածուն է հանդիսանում: Նախաձեռնող խմբի անդամ ԳԵՎՈՐԳ ՊՈՂՈՍՅԱՆԻ խոսքերով` Դ. Դավթյանի թեկնածությունն առաջարկվել է նախաձեռնող խմբի եւ խմբի համախոհների կողմից. ՙՆրա կողմից տնօրեն դառնալու ցանկություն առանձնապես չի եղել: 21 տարի մարդն աշխատում է քոլեջում, ամենասիրված դասախոսներից մեկն է, լավ գեղանկարիչ է: Մարզերի դպրոցների տնօրեններն էլ իրենց հերթին են նամակներ ուղարկել: Նրա թեկնածությունը կարեւոր է բոլորիս համար, ամբողջ ոլորտն է ճանաչում: Նրա տնօրեն լինելու դեպքում միանգամից մթնոլորտը կփոխվի դեպի լավը: Անկախ նրանից` ով կնշանակվի տնօրեն, եթե դա լինի լեգիտիմ, նշանակում է` մենք բոլորս ցանկացած դեպքում կլինենք այդ անձնավորության կողքին՚,- ասաց Գ. Պողոսյանն ու շտապեց պաշտոնապես հայտարարել, որ նախաձեռնող խումբը որեւէ կապ չունի անձնական հարաբերությունների, քաղաքականության ու կուսակցությունների հետ: