ԱՅՍՕՐ ԲԱՑԱՐՁԱԿ ՖԱՎՈՐԻՏԸ ՏԱՐՈՆ ՄԱՐԳԱՐՅԱՆՆ Է
Նախորդ շաբաթ ՙԻրավունքը՚ շրջայց կատարելով Երեւան քաղաքումª հարցում անցկացրեց շուրջ 300 երեւանցիների հետ եւ նկատվեց, որ քաղաքական շունչը դեռ շարունակում է մնալ մարդկանց մեջ, եւ հետընտրական տրամադրությունները դեռ այդքան էլ չեն մարել: Մեր այն հարցին, թե տեղյակ եք, որ կուսակցություններն են մասնակցում ավագանու ընտրություններին, մեծամասնությունը նշում էր ՀՀԿ-ի, ԲՀԿ-ի, ՙԺառանգության՚ անունները: Գտնվեցին մարդիկ, ովքեր հիշատակեցին ՕԵԿ-ի, ՀԱԿ-ի եւ ՀՅԴ-ի անունները եւս: Իսկ այն հարցին, թե ով է գլխավորում վերը նշված կուսակցությունների ավագանու ցուցակը, հարցվողների 90 տոկոսը տալիս էին Տարոն Մարգարյանի անունը, այնուհետ Վարդան Օսկանյանի, իսկ ՙԺառանգության՚ ներկայացուցչին շատերը նույնիսկ չէին էլ ճանաչում եւ անգամ տեղյակ չէին, թե ով է նրանց առաջին համարը, պարզապես այս դեպքում նշում էին միայն կուսակցության անունը: