ԱՄԵՆԱՃԻՇՏ ՔԱՅԼԸ ԿԼԻՆԻ ԿԱՆԽԱՐԳԵԼԻՉ ՀԱՐՎԱԾՆԵՐ ՀԱՍՑՆԵԼԸ
Image may be NSFW.
Clik here to view.
Վերջերս լրագրողների հետ զրույցում ՀՀ պաշտպանության նախարար Սեյրան Օհանյանը չի բացառել սահմանային գոտում կանխարգելիչ միջոցառումների հնարավորությունը: Ըստ նախարարի. "Ոչինչ չի կարելի բացառել, քանի որ սահմանների պաշտպանության եւ զինված ուժերի ներգրավման գործընթացում տարատեսակ միջոցառումներ են նախատեսված, որոնք ուղղված են ինչպես պաշտպանությանը, այնպես էլ հարձակման կանխարգելմանը":
Իսկ թե ինչպիսի՞ պոտենցյալ գործընթացներ են ընթանում սահմանում, եւ ի՞նչ էր նշանակում նախարարի պատասխանը, "Իրավունքը" պարզեց քաղաքագետ ԼԵՎՈՆ ՄԵԼԻՔ-ՇԱՀՆԱԶԱՐՅԱՆԻՑ.
- Մոտավորապես մեկ ամիս առաջ խոսք էր գնում, որ թշնամու հատուկ ջոկատների կողմից իրենց պատկանող տեխնիկայով շարժումներ են նկատվում: Դա այն տեխնիկան չէ, որ սովորական բանակն է օգտագործում: Սա, իսկապես, լուրջ բան է, որովհետեւ հատուկ ջոկատները հիմնականում ոչ թե մեծ ռազմական գործողություն կատարելու նպատակ են հետապնդում, այլ սադրիչ հարձակման համար են, ասենք, ինչ-որ մի գյուղ մորթել-կոտորելու եւ այլն, այսինքն` այն, ինչ պետք է եղել թուրքերին դարեր շարունակ: Իմ տվյալներով դեռ մեկ ամիս առաջ մեր բանակի զգոնությունն ավելի բարձրացրած է, եւ հետեւում են բոլոր այդ շարժումներին, որոնք կատարվում են սահմանային գոտում: Իհարկե, դա պատերազմի նշան չէ, բայց, այնուամենայնիվ, այն կարող է վտանգ ներկայացնել իրենից թե՛ մեր զինվորների, թե՛ մեր խաղաղ բնակչության համար: Ըստ երեւույթին, շարժումները դեռ շարունակվում են, այդ վտանգը դեռ կա, եւ այն ժամանակ էլ ասվեց, որ կանխարգելիչ հարված կհասցնենք այդ կուտակումներին: Պետք է նշեմ, որ միջազգային օրենքի եւ ՄԱԿ-ի կանոնադրության 51-րդ հոդվածը այդ իրավունքը Հայաստանին տալիս է: Այդ հոդվածն իրավունք է տալիս դիմել ինքնապաշտպանության եւ կանխարգելիչ, նույնիսկ զգուշացնող հարվածներ հասցնել:
- Իսկ այս պահի դրությամբ հստակ վտանգ կա՞:
- Մեր սահմաններին ես ոչ մի վտանգ չեմ տեսնում, սակայն առանձին հատվածներում, առանձին գյուղերի վրա կրակոցներ բացել եւ այլն, հնարավոր է: Եվ դա հնարավոր է, հատկապես այն ժամանակ, երբ աշխարհի քաղաքական ուշադրությունը բեւեռվում է դեպի մեր տարածաշրջանը: Համարում եմ, որ ամենաճիշտ քայլը կլինի հենց այդ կանխարգելիչ հարվածները հասցնել այն կուտակումներին, որոնք իրենցից կարող են վտանգ ներկայացնել մեր ժողովրդի համար:
ՀՐԱՆՏ ՍԱՐԱՖՅԱՆ
