ԲՈԼՈՐ ԽԱԽՏՈՒՄՆԵՐԸ ԳՐԱՆՑՎԵԼՈՒ ԵՆ ԿԱՅՔՈՒՄ
Օրերս ՙԱքիլես՚ հասարակական կազմակերպության նախագահ` Է. Հովհանիսյանը նշել էր, թե իբր ՃՈ աշխատակիցներ, երբ մեքենան կանգնեցնում եւ խախտում են արձանագրում, տվյալ խախտումը չի նշվում թերթիկի մեջ, վերջինս առաջարկում էր` գոնե SMS հաղորդագրությունների միջոցով տեղեկացնել վարորդներին իրենց խախտման մասին: Թե, որքանով իրականությանը համապատասխանում պարոն Հովհանիսյանի ասվածը հարցով <Իրավունքը> դիմեց ՀՀ ճանապարհապարեկային ծառայության բաժնի պետ, Ոստիկանության գնդապետ ՆՈՐԻԿ ՍԱՐԳՍՅԱՆԻՆ, ով մասնավորապես նշեց.
- Խոսքը ոչ թե ՃՈ-ի ոստիկանների կողմից արձանագրված խախտումների մասին է, այլ տեխնիկական միջոցներով` արագաչափերով եւ տեսախցիկներով արձանագրված խախտումներով կայացված որոշումների մեջ` իբր թե դիսպոզիցիան հստակ չի նշվում: Սակայն, ասեմ, որ դա այդպես չէ` հստակ նշվում է, թե վարորդը ինչի համար եւ ինչ չափով է տուգանվում: Եվ դիսպոզիցիան եւ սանկցիան տվյալ խախտման համար մանրակրկիտ գրվում է: Ինչ վերաբերում է SMS-ներով տեղեկացնելուն` ապրիլի 15-ից գոյություն ունի ՙՆԻԿԻՏ ՄՈԲԱՅԼ՚ ընկերություն, որտեղ վարորդները կարող են գրանցվել, իսկ խախտում անելու դեպքում SMS էր ստանալ: Ինչպես նաեւ հուլիսի մեկից տեսանկարահանող եւ լուսանկարահանող սարքերով ճանապարհային երթեւեկության կանոնների բոլոր խախտումները տեղադրվելու են Police. am-ում: Վարորդը հնարավորություն կունենա հավաքելով իր տրանսպորտային միջոցի համարանիշը տեղեկանալ` խախտում ունի, թե ոչ:
ԻԼՈՆԱ ԱԶԱՐՅԱՆ