ՀԱՅԱՍՏԱՆԸ ՊԱՐԱՅԻՆ "ԵՎՐԱՏԵՍԻԼՈՒՄ"
Image may be NSFW.
Clik here to view.
<<Պատանի պարողների Եվրատեսիլ>> մրցույթին Հայաստանն առաջին անգամ ներկայացնելու է 17-ամյա Վահագն Մարգարյանը: <<Եվրատեսիլ>> մրցույթի հայկական պատվիրակության ղեկավար ԳՈՀԱՐ ԳԱՍՊԱՐՅԱՆԸ հրավիրած ասուլիսում տեղեկացրեց, որ մրցույթը կայանալու է Հունիսի 14-ին Լեհաստանի Գդանսկ քաղաքում՝ Բալթիկ օպերայի պարի թատրոնում: Ասուլիսին ներկա էին նաեւ Երեւանի պարարվեստի պետական քոլեջի տնօրեն Արմեն Գրիգորյանը եւ Վահագն Մարգարյանը:
Գ.ԳԱՍՊԱՐՅԱՆԸ փաստեց. <<Առաջին անգամ է, որ մասնակցում ենք, սակայն մեծ հույսեր ենք կապում Վահագնի հետ: Պարի հեղինակը Արսեն Մեհրաբյանն է: Ինչպես գիտենք մրցույթին մասնակցում են 16-21 տարեկան պատանիներ: Մեր ներկայացուցիչը երիտասարդներից մեկն է: Իհարկե, սա մի կողմից լավ է, սակայն, կարող են լինել ավելի փորձառու մասնակիցներ: Վտանգավոր մրցակցություն է մեզ սպասվում>>:
Պատանի պարող Վ.ՄԱՐԳԱՐՅԱՆԸ նշեց. <<Առաջին անգամ է, որ մասնակցում եմ մրցույթի, սակայն կանեմ ամեն ինչ, որպեսզի պարը լավ մատուցեմ: Պատասխանատվությունը մեծ է՝ երկիր եմ ներկայցնելու: Անում ենք ամեն ինչ, որ հայկական մշակույթը լավ ներկայացնենք>>:
Ա.ԳՐԻԳՈՐՅԱՆԸ պատմելով իր մտավախությունների մասին փաստեց. <<Մրցույթին մասնակցելու են շատ ուժեղ երկրներ: Ուկրաինան եւ Բելոռուսը այն երկրներն են, որոնք բավականին ուժեղ են, սակայն մենք եւ Վահագնը պատրաստ ենք մրցույթին>>:
Մրցույթին մասնակցելու են 10 երկիր: Մրցույթը լինելու է մեկ օր, սակայն 3 փուլով: Մասնակիցը մեկ ու կես րոպեում ներկայացնելու է իր մենապարը, այնուհետեւ լինելու է խմբակային պար, որից հետո եզրափակիչ անցած 2 մասանակիցները իմպրովիզների միջոցով մրցելու են:
Դե ինչ, մեր մասնակցին մաղթենք հաջողություն:
ԳԱՅԱՆԵ ՀԱՅՐԱՊԵՏՅԱՆ
