NO COMMENT. ՀՀԿ-ԱԿԱՆ ՍԱՄՎԵԼ ՖԱՐՄԱՆՅԱՆԸ ՉԻ «ՃԱՆԱՉՈՒՄ» ԲՀԿ-ԱԿԱՆ ՎԱՀԱԳՆ ՄԱԽՍՈՒԴՅԱՆԻՆ
«Իրավունքը» ԲՀԿ խմբակցության պատգամավոր Վահագն Մախսուդյանից պարզեց` ինչպե՞ս է արձագանքում օրեր առաջ ԱԺ-ում ՀՀԿ պատգամավոր Սամվել Ֆարմանյանի ու ՀԱԿ խմբակցության ղեկավար Լեւոն Զուրաբյանի ծեծկռտւքին: Զարմանալի է, սակայն Վահագն Մախսուդյանն ասաց, որ տեղյակ չէ, թե խոսքն ինչի մասին է: Երբ հիշեցրինք, որ պատգամավորները հարվածել են իրար, ԲՀԿ պատգամավորն ասաց, որ դա դատապարտելի է, ու նորմալ երեւույթ չէ. «Օրենքի սահմանում պետք է իրար հետ բանակցեն, սա օրենսդիր մարմին է»:
Ինչ վերաբերում է ՀՀԿ պատգամավորի այն հայտարարությանը, թե ԲՀԿ-ը ՀԱԿ-ի օգտին փող է բաժանել, Վահագն Մախսուդյանը դա հերյուրանք համարեց. «Դե եթե փող ենք բաժանել, թող կաշառակերության, կամ այլ հոդվածով գործ հարուցի»:
ՀՀԿ պատգամավոր Սամվել Ֆարմանյանն էլ, լսելով մեր հարցը, ասաց. «No comment»: Երբ Ֆարմանյանին տեղեկացրինք, որ պարոն Մախսուդյանը նրան խորհուրդ է տալիս գործ հարուցել կաշառակերության հոդվածով, Ֆարմանյանը հարցրեց. «Մախսուդյանն ո՞վ է»:
Երբ հիշեցրինք ՀՀԿ-ական պատգամավորին Վահագն Մախսուդյանի կուսակցական պատկանելիությունը, Ֆարմանյանն ընկավ մտքերի մեջ (կարծես թե ցանկանում էր հիշել`ով է պատգամավոր Մախսուդյանը), ապա հարցրեց. «Ի՞նչ է ասել Մախսուդյանը»: Լսելով գործընկերոջ խորհուրդը, ՀՀԿ պատգամավորը հարցին կոնկրետ չպատասխանեց. «Տեղի ունեցածի վերաբերյալ իմ հայտարարությունները եղել են հրապարակային, կարող եք ընթերցել, ավելացնելու ոչինչ չունեմ»:
Սոնա Դավթյան