«ՈՉԽԱՐՆԵՐԻ ՎՐԱԵՐԹԻ ՓԱՍՏՈՎ ՀԱՐՈՒՑՎԱԾ
ՔՐԵԱԿԱՆ ԳՈՐԾԸ ԿԱՍԵՑՎԵԼ Է». ՔՆՆՉԱԿԱՆ ԿՈՄԻՏԵ
Նոյեմբերի չորսի հրապարակման մեջ «Իրավունքն» անդրադարձել էր ապրիլի 22-ին Արագածոտնի մարզի Մաստարա գյուղում տեղի ունեցած միջադեպին:
Հիշեցնենք` «Ֆորդ» մակնիշի մեքենայի վարորդը վրաերթի էր ենթարկել Մաստարա գյուղի բնակիչ Ռազմիկ Գեւորգյանի ոչխարների հոտը: Գյուղացին կորցրել էր մոտավորապես 25-30 ոչխար: Ոչխարների հոտին վրաերթի ենթարկելու փաստի առնչությամբ հարուցվել էր քրեական գործ: Քրեական գործի հարուցումից անցել է մոտ յոթ ամիս, սակայն, ինչպես «Իրավունքի» հետ զրույցում հայտարարել էր Մաստարա գյուղի բնակիչ Ռազմիկ Գեւորգյանը, դեռեւս բացահայտված չէ վարորդի ինքնությունը:
Հարցի առնչությամբ «Իրավունքը» գրավոր հարցում էր ուղարկել ՀՀ քննչական կոմիտե`պարզելու, քրեական գործն ինչ ընթացքի մեջ է: Պարզվում է, որ հոկտեմբերի 2-ին ՀՀ քրեական դատավարության օրենսդրությամբ սահմանված կարգով ոչխարների վրաերթի փաստով հարուցված քրեական գործը կասեցվել է առերեւույթ հանցանք կատարած անձի ինքնությունը հայտնի չլինելու պատճառով: Քրեական գործի կասեցման մասին գրավոր տեղեկացվել է տուժող Ռ. Գեւորգյանին:
Սոնա Դավթյան