ՌՈՒՍԱՍՏԱՆԻ «ՍԵՎ» ՑՈՒՑԱԿՈՒՄ ՀԱՅՏՆՎԱԾ ՀԱՅ
ՄԻԳՐԱՆՏՆԵՐԸ ԵՏՄ-Ի ՀԵՏ ՀՈՒՅՍ ՉՊԵՏՔ Է ՈՒՆԵՆԱՆ
Ամիսներ առաջ հայտնի դարձավ, որ մոտ 35.000 Հայաստանի քաղաքացիներ, որոնք ապրում ու աշխատում էին Ռուսաստանում, այդ երկիր մուտք գործել չեն կարող։ Նրանք հայտնվել են ՌԴ-ի միգրացիոն ծառայության մուտքի իրավունքից զրկված մարդկանց ցանկում՝ Ռուսաստանում ապրելու տարիներին վարչական իրավախախտում թույլ տալու կամ միգրացիոն օրենսդրությունը խախտելու համար։
Քանի որ Հայաստանը 2015 թ-ի հունվարի 1-ից լիիրավ կդառնա ԵՏՄ-ի անդամ, ՀՀ էկոնոմիկայի նախարար Կարեն Ճշմարիտյանից «Իրավունքը» պարզեց, արդյոք Ռուսաստան արտագնա աշխատանքի հնարավորությունից զրկվածները կարող են մուտք գործել այդ երկիր: «Հայաստանի`ԵՏՄ-ի անդամակցության համաձայնագիր միգրացիայի կամ արտագնա աշխատանքի հարցեր չի կարգավորում: Մեկը մյուսի հետ ոչ մի առնչություն չունի»,- ասաց նախարարը:
Միգրացիոն ծառայության պետ Գագիկ Եգանյանն էլ օրեր առաջ Իրավունքի հետ զրույցում հայտարարել էր, որ ԵՏՄ-ի անդամակցությունը անկանոն միգրացիայի խնդիրներին չի անդրադառնում: «Այդ մարդկանց ուղղակի ասեք, որ այն երկրում, որտեղ գտնվում են, խախտում չանեն եւ հարգեն այդ երկրի օրենքները»,- հորդորեց միգրացիոն ծառայության պետը:
Սոնա Դավթյան