ՎԱՀԱՆ ԱՐԾՐՈՒՆՈՒ ՀԱՄԱՐ ՀԱՆԴԻՍԱՏԵՍԻ ՀԵՏ ՅՈՒՐԱՔԱՆՉՅՈՒՐ ՀԱՆԴԻՊՈՒՄ ԵՐԱՆԵԼԻ ՊԱՀ Է
Նոյեմբերի 7-ին «Մեցցո» ակումբում տեղի ունեցավ կոմպոզիտոր, երգիչ, ՎԱՀԱՆ ԱՐԾՐՈՒՆՈՒ մենահամերգը եւ «LIVE-2014» ձայնասկավառակի շնորհանդեսը: Այս համերգով հեղինակը եզրափակեց 2014 թվականի ակումբային մենահամերգները: Մենահամերգն անցավ ջերմ մթնոլորտում, քանի որ Վ. Արծրունին նաեւ հանդիսատեսին դարձրեց իր երգի մասնակիցը: «Իրավունքի» հետ զրույցում երաժիշտը խոսեց համերգի, ծրագրում ներառված երգերի եւ առաջիկա մեծ մենահամերգի մասին:
«ՀԱՄԵՐԳՈՎ ՄԵՐ ԽՈՆԱՐՀՈՒՄԸ ԲԵՐԵՑԻՆՔ ԵՐԿՐԱՇԱՐԺԻ ԶՈՀԵՐԻ ՀԻՇԱՏԱԿԻՆ»
-Ընդհանրապես իմ համերգային ծրագրում ներառված են մի քանի երգաշարեր, այսինքն`երգաշար գրված Կոմիտասի բանաստեղծությունների եւ Ռազմիկ Դավոյանի ստեղծագործությունների հիման վրա եւ երգաշար, որտեղ բառերի հեղինակը ես եմ: Այս համերգում ընդգրկել էի նշած բոլոր երգաշարերից մի քանի ստեղծագործություններ, նպատակ ունենալով ստեղծագործությունները լիարժեք ներկայացնել կամերային ժանրի շրջանակներում: Քանի որ այս համերգով մենք մեր խոնարհումը բերեցինք 1988 թվականի երկրաշարժի զոհերի հիշատակին, ուստի ներկայացվեցին այնպիսի ստեղծագործություններ, որոնք համահունջ են մեր պատմությանը, կերպին:
«ՀՆԱՐԱՎՈՐ ՉԷ ՀԱՄԵՐԳԻՑ ԱՌԱՋ ՉՀՈՒԶՎԵԼ»
-Արդեն 30 տարի է ես բեմում եմ եւ ամեն ինչ նույնն է`հնարավոր չէ համերգից առաջ չհուզվել: Յուրաքանչյուր հանդիպում հանդիսատեսի հետ մի երանելի պահ է: Ես միշտ հուզվում եմ եւ հասկանում, որ փոխանակ կոփվեմ, ընդհակառակը`համերգից համերգ ավելի եմ հուզվում: Սա հոգեվիճակի խնդիր է, երբ հասկանում ես, որ ամեն ինչ իր տեղում է: Իմ այս տարվա վերջին համերգը սա է լինելու, որով էլ կավարտվի ակումբային մենահամերգներս: Իսկ հաջորդ տարի լինելու է մեծ համերգների եւ ծրագրերի տարի`ինքս ինձ համար այդպես եմ որոշել:
«2015 ԹՎԱԿԱՆԻՆ ԿՈՒՆԵՆԱՄ ՄԵԾ ՄԵՆԱՀԱՄԵՐԳ»
-Հաջորդ տարի բացի նրանից, որ իմ ծննդյան 50-ամյակն է նաեւ բեմական գործունեության 30-ամյակն է: Ինձ մոտ պահպանվել է մեկ լուսանկար, որը պատկերում է իմ առաջին համերգը, որը 30 տարի առաջ տեղի է ունեցել Երեւանի բժշկական ինստիտուտում: Սա ես համարում եմ իմ առաջին մենահամերգը, որի ընթացքում առաջին անգամ ներկայացրեցի իմ գրած երգերը: Մինչ այդ, իհարկե ունեցել եմ համերգներ, սակայն բոլորովին այլ ծրագրով: Ինձ համար ելակետային էր այդ համրգը:
Ծննդյանս 50 եւ բեմական գործունեության 30-ամյակները կնշանավորվի իմ մեծ մենահամերգով, որը կունենա հարուստ ծրագիր, որտեղ ընդգրկված կլինեն պարզ երգեր: Մինչե համերգի վերջ կհնչեն մի շարք ստեղծագործություններ` սիմֆոնիկ նվագախմբի եւ երգչախմբի համար: Համերգի ընթացքում ես կաշխատեմ ներկայացնել այն ամենը ինչ ստեղծել եմ իմ ստեղծագործական 30 տարիների ընթացքում: Մենահամերգին կներկայացվի նաեւ իմ կողմից շատ սիրված այն երանելի`սիմֆոռոքային ժանրը, որը ներկայացնելու համար առիթներ շատ քիչ են լինում:
Ինչ վերաբերվում է հյուրախաղերին, ապա արդեն ունեմ առաջարկություն եւ նախնական առաջարկություն, որը դեռեւս քննարկման փուլում է:
ԶՎԱՐԹ ԽԱՉԱՏՐՅԱՆ