ՕԵԿ-Ը ՇՆՈՐՀԱԿԱԼ Է ՀԱԿ-ԻՑ
ՍԴՀԿ ատենապետուհի ԱԺ ՀԱԿ խմբակցության պատգամավոր Լյուդմիլա Սարգսյանը հարցազրույցի ժամանակ նշել էր, որ Երեւանի ավագանու ընտրություններում ՕԵԿ-ի ձայները կգերազանցեն ՀՀԿ-ին եւ որ վերջինս հաղթողի կողմից կոալիցիա ստեղծելու առաջարկ կստանա: Տվյալ հայտարարության վերաբերյալ մեկնաբանություն ստացանք ԱԺ ՀՀԿ խմբակցության պատգամավոր ԱՐՏԱԿ ԶԱՔԱՐՅԱՆԻՑ. ՛՛Տիկին Սարգսյանը շատ յուրօրինակ է մոտեցել հարցին: Դա պետք է դիտարկել որպես մեր քաղաքական ընդդիմության մեջ գոյություն ունեցող բազմաթիվ տեսակետներից մեկը: Ասեմ, որ նման կանխատեսումները, տարաբնույթ մեկնաբանությունների կարող են արժանանալ՛՛:
Դե իսկ, այն հարցին, թե ինչու է ՀԱԿ-ը նման խնամախոսական հայտարարություններ անում ՕԵԿ-ի վերաբերյալ ԱԺ ՕԵԿ խմբակցության պատգամավոր ՀՈՎՀԱՆՆԵՍ ՄԱՐԳԱՐՅԱՆ նշեց. ՛՛Կարեւորում եմ պատգամավորի մոտեցումը տվյալ հարցին, միգուցե ուսումնասիրելով մեր թիմային աշխատանքը, յուրաքանչյուր քաղաքական գործիչ կարող է կարծիք հայտնել: Մի խոսքով ես շնորհակալություն եմ հայտնում նրան այդ կարծիքի համար: Պետք է ասեմ, որ մենք պայքարում ենք ու, հուսով ենք, որ բավականին լավ արդյունքներ ենք արձանագրելու, իսկ ընդհանուր առմամբ մենք որեւէ մեկի դեմ չենք պայքարում, մենք պայքարում ենք հանուն Երեւանի, մեր ծրագրերով ու մոտեցումներով: Մենք պայքարում ենք հաղթանակի համար: Պետք է նշեմ նաեւ, որ Հանրապետական կուսակցությունը մեր քաղաքական գործընկերն է ու մենք միշտ համագործակցել ենք ու որեւէ խնդիր չենք տեսնում՛՛:
ՍՈՍԵ ՉԱՆԴՈՅԱՆ