“ԵԹԵ ՇԱՐՈՒՆԱԿԵՆ ՊԱՐԱՊԵԼ, ՄԱՐԶԻԿ ԷԼ ԿԴԱՌՆԱՆ”
Մեկնարկել է փոխպատվաստված օրգանով մարդկանց հայկական առաջին սպորտային խաղերը: Երկօրյա մրցումներն ընդգրկում են փոքր եւ դաշտային թենիս, բոուլինգ, լող ու վազք: Տրանսպլանտ խաղերն արդեն ունեն փոխպատվաստված երիկամներով 25-60 տարեկան 18 մասնակից:
“Իրավունքը” ներկա գտնվելով փոքր թենիսի խաղին` զրուցեց փոխպատվաստված մարդկանց հայկական ասոցիացիայի նախագահ ՍԱՄՎԵԼ ԳՐԻԳՈՐՅԱՆԻ հետ.
- Անցած տարի ստեղծեցինք փոխպատվաստված մարդկանց հայկական ասոցիացիան եւ որոշեցինք, որ նախկին СНГ երկրներից առաջին անգամ Հայաստանը մասնակցի այս խաղերին: Այս տարի միջազգային տրասպլանտ մրցույթները պետք է լինի Հարավ-աֆրիկյան հանրապետությունում: Դե, մենք առայժմ Հայաստանում ենք սկսել, տեսնենք ինչ արդյունքներ կլինեն, երեւի ինչ-որ ձեւով կփորձենք մասնակցել նաեւ միջազգային մրցույթներին:
- Իսկ արդեն որոշակի պայմանավորվածություններ ձեռք բերե՞լ եք:
- Պայմանավորվածություն չկա, արդյունքները կլինեն, հետո նոր կդիմենք:
- Ըստ Ձեզ այս նախաձեռնությունը Հայաստանում ապագա կունենա՞:
- Կարծում եմ` դեռ պիտի խորանա: Այս տարի առաջին անգամ էր կազմակերպվում, մյուս տարի ավելի մեծ մասշտաբով կլինի ու ավելի շատ մասնակիցներ կունենանք: Շատ լավ բան է, պետք է որ իր արդյունքը տա, որովհետեւ վերջնական նպատակն այն է, որ մարդիկ իմանան փոխպատվաստման մասին եւ զարգանա փոխպատվաստումը Հայաստանում: Ավելի շատ մարդիկ վիրահատվեն ու կապված չլինեն դիալեզի ապարատից, այսինքն ` ազատ կյանքի որակը հիմա ուրիշ է արդեն:
Եվ այսպես, փոքր թենիսի մրցումների հաղթողներն են`
1-ին տեղ` Աղասի Գրիգորյան
2-րդ տեղ`Մնացական Եսայան
3-րդ տեղ` Էդմոն Ղարդաշյան:
Վերջիններիս մարզիչը` ՀՊՃ համալսարանի դասախոս, մանկավարժ ՀՈՎՀԱՆՆԵՍ ԱՌԱՔԵԼՅԱՆԸ գոհ է արդյունքներից.
- Ընդամենը մեկ ամիս են մարզվել, բայց արդեն արդյունքն ունենք: Ես ընդամենը ցույց եմ տալիս, կատարողն իրենք են, յուրացնողը` նույնպես: Երեքն էլ հավասար մասնակցել են պարապմունքներին, բայց ում բաժին հասավ առաջին տեղը, բնականաբար, ավելի աշխատասեր է եղել, իսկ երկրորդ եւ երրորդ տեղերը զբաղեցնողներն էլ իրենց չափով լավագույնս ներկայացան:
- Իսկ նախկինում փոխպատվաստված օրգանով անձանց մարզե՞լ եք:
-Միշտ պարապել եմ ուսանողների եւ աշակերտների հետ եւ 
առաջին անգամ էր, որ մարզում էի փոխպատվաստված օրգանով անձանց: Ես չեմ համարում, որ նրանք խնդիր ունեն, որովհետեւ պարապմունքների ընթացքում իրենք միշտ էլ շատ ազատ, հանգիստ, սպորտային վիճակում են եղել: Ոչ մի խնդիր չի եղել պարապմունքների ընթացքում, որ ասեմ, թե ինչ-որ հարցում նեղվեցին, չկարողացան կամ չդիմացան: Ես նրանց համարում եմ հիմնական խմբի պարապողներ:
- Պարոն Առաքելյան, իսկ նախքան պարապմունքները սկսելը խորհրդակցե՞լ եք բժիշկների հետ:
- Բնականաբար, նախնական հենց իրենց բժիշկներից, ովքեր մասնակցում են, հարցրել ենք նրանց ծանրաբեռնվածության մասին: Սկզբնական մարզումները ուղղակի նախավարժանքի տեսքով չենք արել, այլ ավելի թույլ ենք կազմակերպել պարապմունքները: Ինքս նաեւ կինեզոլոգ եմ եւ, եթե որեւէ մեկն իրեն վատ զգար կամ ինչ-որ խնդիրներ ունենար, ապա անպայման պարապմունքները կթեթեւացնեի կամ ընդհանրապես կդադարեցնեի մարզելը:
- Որքանո՞վ եք կարեւորում այս նախաձեռնությունը:
- Առօրյայում մարդիկ մտածում են, որ, եթե ինչ-որ մեկը պրոբլեմ ունի, ուրեմն`հասարակության լիարժեք անդամ չէ կամ այլ ձեւի վերաբերմունք են ունենում նրա նկատմամբ: Իսկ հիմա տեսնում ենք, որ իրենք իրենց կեցվածքով , իրենց պահվածքով, լիարժեք մարդիկ են: Նույնիսկ ասում եմ, եթե շարունակեն պարապել, մարզիկ էլ կարող են դառնալ եւ կապ չունի, թե ինչ մարզաձեւից:
- Կկարողանա՞նք հասնել նրան, որ նաեւ միջազգային տրանսպլանտ խաղերին մասնակցի Հայաստանը:
-Իհարկե, եթե իրենք շարունակեն մարզվել, պարզ է, որ կկարողանանք: Բայց , հնարավոր է ինչ-որ երկրից ներկայացնի մեկն, ով աշխարհի կամ Եվրոպայի չեմպիոն է: Սակայն, որ մերոնք կկարողանան, այդքան կամք ունեն, դա միանշանակ է: Ցանկացած երկրի հետ կարող ենք մրցել, եթե չլինեն պրոֆեսիոնալ մարզիկներ: Չենք կարող մեկ տարում պատրաստել հակառակորդ տասը տարվա պարապողի դեմ:
ՀՐԱՆՏ ՍԱՐԱՖՅԱՆ