ՎԱԶՈՒՄ ԵՆՔ ԵՎՐՈՊԱ, ՈՐ Ի՞ՆՉ ԱՆԵՆՔ
Հարցազրույց ՍԻՄ նախագահ, ՀՀԿ խորհրդարանական խմբակցության անդամ ՀԱՅԿ ԲԱԲՈՒԽԱՆՅԱՆԻ հետ
-Ի՞նչ է պետք, որ ընդդիմությունը կարողանա դուրս գալ այն «փոսից», որի մեջ հայտնվել է անցած համապետական եւ մայրաքաղաքային ընտրությունների արդյունքում։
-Ոմանք նեղանում էին, երբ ասում էի, որ ընտրություններն ամեն ինչ իր տեղը կդնեն՝ Րաֆֆի Հովհաննիսյանը կապ չունի այն ձայների հետ, որ իր իսկ համար անսպասելի ստացել է նախագահական ընտրություններում, հիստերիա էին բարձրացնում։ Հիմա կարծես թե բոլորը հասկացել են, որ պետք չէր հիստերիայի մեջ ընկնել՝ ճշմարտությունը պետք է ընդունել այնպես, ինչպես կա։
Ցավոք, մենք չունենք ընդդիմություն, որի կարծիքը հետաքրքիր կլիներ գոնե լսել. մեր ընդդիմությունը չի սիրում նայել ճշմարտության երեսին, սեփական սխալները թողած՝ միայն քննադատում է դիմացինին, այլընտրանքային առաջարկներ չի ներկայացնում։
Չկա փաստարկված, առարկայական քննադատություն, որը հիմնված կլիներ գաղափարական հենքի վրա. դու ապուշ ես, ապուշը ինքդ ես՝ ընդդիմության հետ քաղաքական բանավեճը շատ հաճախ մոտավորապես այս մակարդակի վրա է ընթանում։ Եվ, ըստ որում՝ քննադատողներից շատերը ժամանակին զբաղեցրել են մեծ-մեծ պաշտոններ։
-Պատգամավորների եւ կառավարության անդամների հայտարարագրերում պաշտոնապես ամրագրված տվյալներից՝ գույքային եւ ֆինանսական կարողություններից դատելով, ներկայիս պաշտոնյաները հետ չեն մնում նախկիններից։