ԱՐԵՎԻԿ ԱԼԱՎԵՐԴՅԱՆ. ԱՂԱԲԼԻԹ ՈՒՏՈՒՄ ԷԻ, ԵՐԲ ՓՈՔՐ ԷԻ
Հունվարի 26-ը Սուրբ Սարգսի` սիրահարների տոնն է: Մինչ երիտասարդներն անհաբեր սպասում են այդ օրվան` «ԻՐԱՎՈՒՆՔՆ» այդ առթիվ մի քանի հարցեր ուղղեց հունվարի 13-ից այլեւս Փարիզում բնակություն հաստատած ԱՐԵՎԻԿ ԱԼԱՎԵՐԴՅԱՆԻՆ, փորձելով պարզել նրա վերաբերմունքն այդ օրվա մասին: Արեւիկ Ալավերդյանը խոստովանեց, որ այդքան էլ կարեւորթյուն չի տվել Սուրբ Սարգսի տոնին, քանի որ.
- Մի քանի տարի շարունակ այդ օրը փոքր-ինչ տխուր էի լինում, ես եւ ամուսինս գտնվում էինք տարբեր երկրներում: Ուրախ եմ, որ այս տարի սիրո քաղաք Փարիզում` ռոմանտիկ միջավայրում կնշենք Սուրբ Սարգսի տոնը եւ կփոխանակվենք նվերներով:
- Իսկ երբեւէ ճաշակե՞լ եք աղաբլիթ:
- Աղի բլիթ ուտում էի, երբ փոքր էի: Սակայն, միշտ կիսատ, քանի որ անտանելի էր բլիթի աղիությունը: Երևի հենց այդ իսկ պատճառով երբեւէ երազ չեմ տեսել:
- Ի՞նչ եք նվիրելու սիրելիին:
- Դեռ չեմ որոշել, թե ինչ կնվիրեմ, բայց գիտեմ, թե ես ինչ եմ ստանալու այդ օրը նրա կողմից:
- Իսկ ի՞նչ կմաղթեք նրանց, ովքեր դեռ չեն հանդիպել իրենց սիրուն:
- Մաղթում եմ մեծ սեր: Հրաշալի է, երբ սիրում ես եւ սիրված ես:
ԳԱՅԱՆԵ ՀԱՅՐԱՊԵՏՅԱՆ